NANAWAGAN si Manila Mayor Honey Lacuna sa lahat ng mga opisyal at kawani ng ibat-ibang departamento ng lungsod na gawin ang tungkulin nang hindi tinitingnan bilang trabaho.
Ito ang paghihimok ng alkalde sa isinagawang regular flag raising ceremony nitong Lunes ng umaga.
“Mas magaan ang trabaho kung ini-enjoy,” ayon kay Lacuna.
Pinangunahan ni City Engineer head Engr. Moises Lacantara bilang host ang flag raising ceremony kung saan pinuri rin sya ni Lacuna dahil sa pag-uulat nito ng ibat-ibang accomplishment na nagagawa ng mga kawani ng nasabing tanggapan.
“Isa ang Engineer’s office sa may pinakamalaking departamento at sila rin ang may pinakamaraming report sa kanilang nagagawa at ginagawa sa araw-araw kaya maraming-maraming salamat,” pahayag ni Lacuna.
Idinagdag pa ng alkalde na mapalad ang mga nagtatrabaho sa gobyerno dahil hindi lahat ay nabibigyan ng pagkakataon na maging tagapaglingkod ng bayan.
Dahil na rin sa nalalapit na ang pagdiriwang ng Araw ng mga Puso ngayong Biyernes, nakatanggap ng bouquet of flowers si Lacuna kay Alcantara at nabigyan din ng rosas ang lahat ng mga kababaihan na dumalo sa nasabing flag raising ceremony.
Bilang pagtatapos ng kaniyang maikling mensahe ay napatawa nito ang lahat ng dumalo sa nasabing aktibidad, dahil sa kaniyang binitiwang hugot line.
“Sa mga malulungkot, wala ka mang ka-date sa Valentine’s day, ang mahalaga, sanay ka na,” pabirong sabi ni Mayor Honey. (MARISA SON)
