“Tama na!” Hirit ni Cayetano laban sa korapsyon, selective justice

NANAWAGAN  si Senate Minority Leader Alan Peter Cayetano nitong Martes sa mga Pilipino na magkaisa laban sa korapsyon at sa tinawag niyang “selective justice” sa patuloy na isyu ng flood control corruption.
“Dumating na ang panahon na kailangan sabihin nating, ‘Tama na! Tama na!’” sabi ni Cayetano sa harap ng mahigit 12,000 tao sa isang lightning rally sa EDSA nitong June 30, 2026.
Aniya, umasa ang mga Pilipino na tututukan ng gobyerno ang pananagutan matapos ang 2025 State of the Nation Address (SONA) ng Pangulo kung saan isiniwalat ang mga umano’y ghost projects at irregularidad sa flood control programs ngunit aniya nawalan ito ng momentum dahil sa interes sa pulitika.
Binanggit niya ang mga imbestigasyon ng Senate Blue Ribbon Committee na pinangunahan nina Senador Panfilo Lacson at Rodante Marcoleta, na aniya’y nakatulong sa paglalantad ng mga anomalya ngunit kalaunan ay nawala ang pokus sa paghahanap sa mga tunay na may pananagutan.
“Nagkaisa kami sa Minority noon… kung makakatulong sa bansa, kung mahahanap ang magnanakaw, kung ang kadiliman ay mabibigyan ng ilaw, OK na,” wika niya.
“Nagspeech po siya (Lacson), na-reveal ang ghost projects. Ang dami naexpose. And then pinalitan si Senator Marcoleta [bilang chairman ng Blue Ribbon]. Noong pinalitan si Sen. Marcoleta, ang mastermind ay senator na lang. Nawala na y’ung iba [na sangkot] sa departments, secretaries, congressman, at nawala na y’ung napakalaking tao na siya ang nagpagalaw ng lahat,” dagdag niya.
Binigyang diin niya ang pahayag ni Ombudsman Jesus Crispin Remulla na may “mastermind” sa likod ng mga anomalya, at ikinumpara ito sa posisyon ni Lacson sa isyu.
“Sabi ni Ombudsman Remulla mismo na merong mastermind. Ano po ang sabi ni Sen. Lacson? Walang mastermind. Malinaw na malinaw po na ang unang nagbigay ng pag-asa sa atin na Pangulo ay hindi na po nahihiya. Sa totoo lang po, kawalang hiyaan na ang ginagawa,” wika niya.
Ayon kay Cayetano, hindi pa lubos na naimbestigahan ang korapsyon sa pondo para sa flood control at road maintenance funds noong 2023, kahti  malaki ang inilaan sa budget.
“Noong 2023, halos isang trilyong piso ang budget ng DPWH. Ang flood control projects, mahigit P300B. Ang maintenance ng roads, unang beses naging one third [ang allocation] ng budget. Mahigit din na P300B,” wika niya.
“Usually 70% ng budget ay bagong kalye, tulay, at building. First time noong 2023 na [pinakamalaki ang] flood control at maintenance. Ang maintenance po, hindi pa iniimbestighan hanggang ngayon,” dagdag niya, at iginiit na ganito rin ang naging alokasyon noong 2024 sa kabila ng mga kulang na imbestigasyon.
Tiniyak ni Cayetano sa mga nagpoprotesta na kahit may pressure, patuloy ang mga nagsusulong ng kaso ng korapsyon sa kanilang trabaho.
Hinimok din niya ang Pilipino sa iba’t ibang panig ng pulitika, relihiyon, at rehiyon na magkaisa laban sa korapsyon.
“Huwag po ninyo kaming alalahanin… Desidido po kaming lumaban,” wika niya, sabay banggit kina Marcoleta at ibang kasamahan sa Minority tulad nina Senador Jinggoy Estrada, Ronald Dela Rosa, Loren Legarda, Imee Marcos, Pia Cayetano, at Robinhood Padilla.
“Tama na! … Sana bilang Pilipino, makasigaw tayo ng ‘We are one [against corruption]’” ani Cayetano, na paulit-ulit nananawagan para sa pagkakaisa at accountability. (Nino Aclan)