Maaaring lumawak pa ang imbestigasyon ng Land Transportation Office (LTO) sa kontrobersyal na rehistro ng isang Porsche 918 Spyder matapos lumitaw ang umano’y pagkakaiba sa mga dokumento ng pagpaparehistro at rekord ng pag-aangkat nito.

Nagsimula ang usapin sa umano’y hindi awtorisadong plaka na ginagamit ng naturang mamahaling sasakyan, ngunit nauwi ito sa mas malalim na pagsusuri sa mga rekord ng rehistro at importasyon.

Partikular na susuriin ang naiulat na pagkakaiba sa Customs entry, kung saan tinukoy umano ang sasakyan bilang isang brand-new Porsche Boxster, habang sa iba pang dokumento ay nakasaad itong Porsche 918 Spyder.

Dahil dito, mahalaga ang koordinasyon ng LTO at Bureau of Customs (BOC) upang mapagkumpara ang mga rekord at matukoy kung may mga iregularidad sa transaksyon.

Pinangunahan ni LTO Assistant Secretary Markus Lacanilao ang pagtutok sa naturang usapin, kabilang ang mga naunang natuklasan hinggil sa umano’y kaduda-dudang pagpaparehistro ng ilang imported at mamahaling sasakyan.

Samantala, patuloy naman ang hakbang ni BOC Commissioner Ariel Nepomuceno laban sa smuggling, misdeclaration at iba pang modus na maaaring magresulta sa pagkawala ng kita ng pamahalaan.

Maaari ring magkaroon ng mahalagang papel dito ang Post Clearance Audit Group (PCAG) ng BOC na pinamumunuan ni Assistant Commissioner Atty. Philip Vincent “Jet” Maronilla.

Sa pamamagitan ng post-clearance audit, maaaring suriin kung tama ang deklarasyon, valuation at assessment ng mga buwis at taripa na dapat bayaran para sa naturang sasakyan.

Kung mapatutunayang may pagkakaiba sa deklarasyon at aktuwal na halaga o pagkakakilanlan ng sasakyan, maaari nitong matukoy kung may nawalang kita ang pamahalaan at kung may kaparehong iregularidad sa iba pang importasyon.

Mahalaga ang pagtutulungan ng dalawang ahensya dahil magkaiba ang rekord na kanilang hawak. Nasa LTO ang impormasyon hinggil sa pagpaparehistro ng sasakyan, habang nasa BOC naman ang mga rekord tungkol sa pag-aangkat, valuation, assessment at nakolektang buwis at taripa.

Sa paghahambing ng mga rekord, mas madaling matutukoy ang anumang hindi pagtutugma at posibleng paglabag.

Hindi lamang ang isang Porsche ang dapat maging sentro ng pagsusuri. Kung mapatutunayang bahagi ito ng mas malawak na problema sa pagpaparehistro ng mga imported at mamahaling sasakyan, kailangang tukuyin ng mga ahensya ang mga butas sa sistema, alamin kung sino ang maaaring managot, at tiyaking makokolekta ng gobyerno ang anumang nararapat na buwis at kita.

Ang isyu ay hindi lamang tungkol sa pagpapatupad ng mga patakaran sa pagpaparehistro. Nakapaloob din dito ang pangangalaga sa kita ng pamahalaan at pagpigil sa mga posibleng modus sa pag-aangkat ng sasakyan.

Sa ganitong pananaw, maaaring magsilbing daan ang imbestigasyon sa Porsche 918 Spyder para sa mas malawak na pagsusuri at paglilinis ng sistema sa pagpaparehistro at pag-aangkat ng mga sasakyan.

Sa pagtutulungan ng LTO at BOC, layunin ng mga ahensya na matukoy ang katotohanan, tugunan ang anumang butas sa sistema, at matiyak na makokolekta ng pamahalaan ang bawat pisong nararapat dito. (BONG SON)