Mariing kinondena ng isang opisyal ang pagpapataw ng sanksyon ng Tsina laban kay Defense Secretary Gilberto “Gibo” Teodoro Jr., na aniya’y isang tahasang paglapastangan sa soberanya ng Pilipinas at pagtatangkang takutin ang mga opisyal na naninindigan para sa pambansang interes.

Ayon kay Dr. Jose Antonio Goitia, ang hakbang ng Beijing ay hindi lamang nakatuon kay Teodoro kundi nagsisilbing babala rin sa mga Pilipinong patuloy na naninindigan para sa karapatan at soberanya ng bansa.

“Ang mga sanksyong ito ay hindi talaga tungkol kay Secretary Teodoro. Isa itong mensaheng ipinadadala sa bawat Pilipinong naniniwalang dapat ipaglaban ang ating soberanya,” pahayag ni Goitia.

Iginiit niya na walang dayuhang pamahalaan ang may karapatang diktahan kung paano ipagtatanggol ng mga opisyal ng Pilipinas ang mga karapatang teritoryal ng bansa.

Dagdag pa niya, mas marami umanong sinasabi ang naturang hakbang tungkol sa nagpataw nito kaysa sa mismong pinatawan ng parusa at dapat lamang itong magsilbing dahilan upang higit pang pagtibayin ng bansa ang paninindigan nito sa usapin ng soberanya.

Nagpahayag din si Goitia ng pagkabahala sa mga ulat na nananatili pa rin sa loob ng lagoon ng Bajo de Masinloc ang isang lumulutang na istrukturang Tsino sa kabila ng paulit-ulit na diplomatikong protesta ng Pilipinas.

Ayon sa kanya, hindi dapat maliitin ang naturang isyu dahil maaaring maging bahagi ito ng unti-unting pagpapalawak ng impluwensya at presensya ng ibang bansa sa mga lugar na saklaw ng soberanya at karapatang pandagat ng Pilipinas.

“Ganito unti-unting naaagnas ang mga karapatang soberano ng isang bansa. Hindi palaging sa pamamagitan ng isang malaking pangyayari, kundi sa sunod-sunod na hakbang na naglalayong gawing normal ang mga bagay na hindi dapat kailanman tanggapin bilang normal,” ani Goitia.

Binigyang-diin niya na higit pa sa isang bahura o anyong pandagat ang nakataya sa usapin ng Bajo de Masinloc.

“Ang tunay na usapin ay kung kikilalanin ang Pilipinas bilang isang soberanong bansang dapat igalang ang mga karapatan nito, o bilang isang bansang maaaring unti-unting mapilit at mapahina sa pamamagitan ng patuloy na presyon at pananakot,” dagdag niya.

Nanawagan din si Goitia sa mga Pilipino na manatiling nagkakaisa sa pagsuporta sa mga legal at diplomatikong hakbang ng pamahalaan upang maipagtanggol ang mga karapatan ng bansa sa West Philippine Sea.

Kasabay nito, nagpahayag siya ng buong suporta kay Teodoro, na aniya’y kumakatawan sa paninindigan ng maraming Pilipinong hindi handang isuko o ikompromiso ang pambansang soberanya.

Si Goitia ay Chairman Emeritus ng Alyansa ng Bantay sa Kapayapaan at Demokrasya, People’s Alliance for Democracy and Reforms, Liga Independencia Pilipinas, at Filipinos Do Not Yield Movement. Hawak din niya ang titulong Juris Doctor. (BONG SON)