Hindi nakadalo si Ateneo de Manila University basketball coach na si Tab Baldwin sa unang pagdinig na ipinatawag ng Department of Labor and Employment (DOLE) kaugnay ng usapin sa kanyang Alien Employment Permit (AEP).
Sa halip na si Baldwin, ang kanyang abogado lamang ang humarap sa pagdinig. Sa kabila nito, itinuloy pa rin ang paunang pagtalakay sa kaso sa pangunguna ni Francis Tolentino at ng kinatawan ng coach.
Ayon kay Tolentino, hindi nakadalo si Baldwin dahil sa kondisyon ng kanyang kalusugan kaya ang kanyang abogado ang dumalo bilang kinatawan.
Binigyan naman ng DOLE si Baldwin hanggang Hunyo 25 upang magsumite ng kanyang verified answer at iba pang kinakailangang dokumentong may kaugnayan sa kanyang AEP.
Ikinagulat din umano ni Tolentino ang pagsusumite ng Alien Certificate of Registration (ACR) na inilalabas ng Bureau of Immigration sa halip na mga dokumentong direktang may kaugnayan sa AEP.
Batay sa isinumiteng ACR, nakasaad na si Baldwin ay may permanent resident visa status sa bansa. Gayunman, ayon sa DOLE, kailangan pa rin niyang kumuha ng wastong AEP alinsunod sa umiiral na mga regulasyon.
Matapos ang pagsusumite ng verified answer, itinakda ng DOLE ang pormal na pagdinig sa Hunyo 29 upang ipagpatuloy ang pagtalakay sa kaso.
Binigyang-diin ni Tolentino na layunin lamang ng kagawaran na matukoy ang saklaw at bisa ng AEP na ipinagkaloob kay Baldwin.
Sa kasalukuyan, nakatuon pa lamang ang imbestigasyon ng DOLE kay Baldwin. Susuriin pa umano ng ahensya kung kinakailangan ding ipatawag ang Ateneo de Manila University at kung may pananagutan ang unibersidad kaugnay ng usapin.
Samantala, nauna nang inanunsyo ni Baldwin ang kanyang pagbibitiw bilang head coach ng Ateneo de Manila University men’s basketball team. (NINO ACLAN)
