Nanawagan ang isang opisyal ng masusing imbestigasyon sa mga kabaong na iniulat na natagpuan sa iba’t ibang bahagi ng Metro Manila, kasabay ng pagbibigay-diin na hindi dapat malihis ang usapin sa mas malaking isyu ng soberanya ng Pilipinas.

Ayon kay Chairman Emeritus Dr. Jose Antonio Goitia, kailangang matukoy kung sino ang naglagay ng mga kabaong, kung magkakaugnay ang mga insidente at kung may nilabag na batas o ordinansa.

“Imbestigahan kung sino ang naglagay ng mga kabaong. Alamin ang mga katotohanan. Panagutin ang sinumang lumabag sa batas,” ani Goitia.

Gayunman, sinabi niyang hindi dapat paghaluin ang pagkakakilanlan ng mga nasa likod ng mga pahayag at ang mensaheng nais nitong iparating.

“Ngunit huwag nating paghaluin ang tanong kung sino ang gumawa ng pahayag at ang mismong mensaheng nais nitong iparating,” dagdag niya.

Ayon kay Goitia, lehitimo ang pangamba ng maraming Pilipino hinggil sa China, partikular sa usapin ng soberanya, karapatang teritoryal at seguridad ng bansa, bunsod ng mga tensiyon at komprontasyon sa West Philippine Sea.

Kabilang dito, aniya, ang mga insidente ng pangha-harass sa mga mangingisdang Pilipino at mapanganib na pagmamaniobra at iba pang aksyon laban sa mga sasakyang pandagat ng Pilipinas.

“Hindi nangangailangan ng pagiging padalos-dalos ang pagiging makabayan. Ngunit hindi rin nangangahulugan ang pagiging responsableng mamamayan na kailangan nating manahimik habang hinahamon ang ating soberanya,” ani Goitia.

Nagbabala rin siya laban sa pagbibintang nang walang ebidensya at sa paggamit ng panawagang “facts over fear” upang maliitin ang lehitimong pangamba ng mga Pilipino sa isang dayuhang kapangyarihan.

“Kung lumabag sa batas ang mga responsable, kasuhan sila. Kung mapatutunayang may organisasyong nasa likod nito, ilabas ang ebidensya,” pahayag niya. “Hangga’t wala iyon, huwag tayong mag-imbento ng organisasyon at huwag ding mag-imbento ng sabwatan.”

Binigyang-diin ni Goitia na mahalaga ang ebidensya at batas, ngunit hindi rin dapat isantabi ang usapin ng soberanya.

“Maaaring inilagay ang mga kabaong sa mga lansangan ng Pilipinas. Ngunit ang mas malaking tanong na iniwan ng mga ito ay tungkol sa mismong bayan: hanggang saan tayo handang tumindig upang ipagtanggol ang ating soberanya?” aniya.

Si Goitia ay Chairman Emeritus ng Alyansa ng Bantay sa Kapayapaan at Demokrasya (ABKD), People’s Alliance for Democracy and Reforms (PADER), Liga Independencia Pilipinas (LIPI), at Filipinos Do Not Yield Movement (FDNY). (Bong Son)