“Makakatulong ito sa laban kontra pandemya!”

Masaya at suportado ni Senate Minority Leader Alan Peter Cayetano ang pagpasa ng batas na lumikha sa Virology Institute of the Philippines (VIP) — isang malaking hakbang para palakasin ang kakayahan ng bansa laban sa mga susunod na health emergencies.

Nilagdaan ni Pangulong Ferdinand “Bongbong” Marcos Jr. ang Republic Act No. 12290 noong Setyembre 12, 2025, kung saan co-author sina Senador Alan at kapatid niyang si Senadora Pia Cayetano.

Layunin ng VIP na maging sentro ng research at development pagdating sa mga virus at sakit na posibleng makaapekto sa tao, hayop, at halaman.

“Kailangang mabilis ang kilos ng gobyerno sa tuwing may banta sa kalusugan at kabuhayan ng mga kababayan natin,” ani Cayetano.

“Sa panahon ng emergency, magiging mahalaga ang papel ng VIP para makaligtas ng buhay,” dagdag pa niya.

Matagal nang isinusulong ng magkapatid na Cayetano ang pagtatatag ng VIP bilang bahagi ng One Health approach, isang sistemang tumitingin sa epekto ng virus sa tao, hayop, at kapaligiran, at gumagamit ng siyensiya sa paggawa ng mga polisiya.

“Science must lead the way. Tahimik pero epektibong tumutulak ng progreso ang agham at teknolohiya. Dapat natin itong palakasin, ” giit ni Alan.

Sa ilalim ng batas, ilalagay ang VIP sa ilalim ng Department of Science and Technology (DOST) at magkakaroon ng mga sumusunod na mandato: Magsagawa ng virology research; Mag-develop ng bakuna at diagnostic tools; Gumawa ng prototype para sa mga gamot; Mag-train ng mga lokal na siyentipiko. Makikipagtulungan din ito sa Research Institute for Tropical Medicine (RITM) at iba pang ahensya para sa joint research at sharing ng resources.

Unang iminungkahi ang VIP noong kasagsagan ng COVID-19 pandemic bilang tugon sa kakulangan ng bansa sa local capacity para sa virus research, bakuna, at testing.

“Strong public health systems depend on science and innovation,” wika ni Cayetano.

“Sa pamamagitan ng VIP, binibigyan natin ng kumpletong armas ang ating mga siyentipiko para protektahan ang ating bayan at kinabukasan,” pahayag pa ng solon. (NIÑO ACLAN)