Mariing kinondena ni Alyansa ng Bantay sa Kapayapaan at Demokrasya (ABKD) Chairman Emeritus Dr. Jose Antonio Goitia ang AI-generated video ng China Daily na umano’y naglalarawan sa mga Pilipino bilang mga unggoy, at iginiit na walang puwang ang rasismo sa sibilisadong mundo.

Ayon kay Goitia, hindi lamang ang paninindigan ng Pilipinas sa usapin ng West Philippine Sea ang tinarget ng naturang video kundi maging ang dignidad ng sambayanang Pilipino.

“Hindi lamang Pilipinas ang inatake ng videong ito. Ang tinarget nito ay ang dignidad ng bawat Pilipino. Walang bansang nagsasabing iginagalang nito ang pandaigdigang batas at ang dangal ng tao ang dapat magpalaganap ng propagandang naglalarawan sa ibang mamamayan bilang mas mababa sa tao,” ani Goitia.

Sinabi niya na ang naturang video ay isang anyo ng rasistang propaganda na gumamit ng artificial intelligence upang hamakin ang buong sambayanan at dapat umanong kondenahin ng lahat ng Pilipino.

Inugnay rin ni Goitia ang paglabas ng video sa naunang pahayag ng ilang Chinese scholars na inaangkin umano ang Batanes bilang bahagi ng China, isang pag-aaral na kalaunan ay binawi matapos makatanggap ng matinding batikos.

“Una nilang sinubukang baluktutin ang ating kasaysayan. Nang mabigo ang kanilang kasinungalingan sa harap ng katotohanan, heograpiya, at pandaigdigang batas, ang sambayanang Pilipino naman ang kanilang pinuntirya. Kapag bumabagsak ang kasinungalingan, lumalakas ang propaganda. At kapag nabibigo ang propaganda, nauuwi ito sa rasismo,” dagdag niya.

Binigyang-diin din ni Goitia na nananatiling mahalagang batayan ng rules-based international order ang 2016 Arbitral Award sa usapin ng West Philippine Sea.

Aniya, may karapatan ang China na kuwestiyunin ang arbitral ruling, ngunit hindi ito dahilan upang lapastanganin ang sambayanang Pilipino.

“Ang pamahalaang may tiwala sa lakas ng sariling posisyon ay naghaharap ng ebidensya. Ang pamahalaang gumagamit ng rasistang panlalait ay inilalantad lamang ang kahinaan ng sarili nitong argumento. Maaaring makatawag-pansin ang propaganda, ngunit hindi nito kailanman mapapalitan ang katotohanan,” aniya.

Pinuri rin ni Goitia ang Department of National Defense (DND) sa mariing pagkondena sa naturang video at nanawagan ng pagkakaisa laban sa anumang pagtatangkang maliitin ang soberanya at dignidad ng bansa.

Hinimok din niya ang China Daily na agad alisin ang naturang video at humingi ng walang pasubaling paumanhin sa sambayanang Pilipino.

“Dapat agad alisin ng China Daily ang nakahihiyang videong ito at humingi ng walang pasubaling paumanhin sa sambayanang Pilipino. Walang lugar ang state-sponsored racism sa komunidad ng mga sibilisadong bansa. Habang nananatiling nakalathala ang videong ito, patuloy nitong nilalait ang bawat Pilipino at lalo lamang nitong sinisira ang kredibilidad ng Tsina sa pandaigdigang komunidad,” pahayag ni Goitia.

Binigyang-diin pa niya na hindi maaaring yurakan ang dignidad at kuwestiyunin ang soberanya ng Pilipinas.

“Hindi mga unggoy ang mga Pilipino. Tayo ay isang malaya at may soberanyang sambayanan. Tayo ang mga inapo ng mga bayaning lumaban sa mga mananakop at nagtayo ng Republika sa pamamagitan ng tapang at sakripisyo. Maaaring lumikha ng propaganda ang Tsina, ngunit hindi nito kailanman maitatakda kung sino ang mga Pilipino. Hindi maaaring yurakan ang ating dignidad. Hindi maaaring kuwestiyunin ang ating soberanya,” pagtatapos ni Goitia.

Si Dr. Jose Antonio Goitia ay Chairman Emeritus ng Alyansa ng Bantay sa Kapayapaan at Demokrasya (ABKD), People’s Alliance for Democracy and Reforms (PADER), Liga Independencia Pilipinas (LIPI), at Filipinos Do Not Yield Movement (FDNY). Siya ay nagtapos ng Juris Doctor at Doctor of Philosophy (PhD), at may mga advanced degree sa MNSA, MPA, at MBA. (BONG SON)