Mariing iginiit ng isang opisyal na hindi maaaring manahimik ang bansa sa harap ng mga pahayag na aniya’y tuwirang umaatake sa legal na posisyon ng Pilipinas at nagpapahina sa mga institusyong nagtatanggol sa soberanya nito.

“Ang mga pag-atake sa legal na posisyon ng Pilipinas, lalo na laban sa Philippine Coast Guard at sa Armed Forces of the Philippines, ay hindi maaaring palampasin,” ani Dr. Jose Antonio Goitia. “Kapag pinahihina ang mga institusyong nagtatanggol sa Republika, ang neutralidad ay hindi na pagiging maingat. Ito ay nagiging pagsuko.”

Binigyang-diin ni Goitia na ang ganitong mga pahayag ay may seryosong epekto sa kakayahan ng bansa na ipagtanggol ang soberanya nito sa ilalim ng internasyonal na batas. Ayon sa kanya, madalas na ikinukubli sa wika ng pragmatismo ang mga panawagan para sa pag-urong, subalit malinaw ang naging aral ng kasaysayan.

“Ang mga panawagan para sa pag-urong ay bihirang aminin bilang pagtataksil,” dagdag niya. “Madalas, binabalot ang mga ito sa wika ng pragmatismo hanggang ilantad ng kasaysayan ang tunay na pinsala.”

Malinaw ang Batas

Giit ni Goitia, malinaw ang batayan ng karapatan ng Pilipinas sa ilalim ng United Nations Convention on the Law of the Sea (UNCLOS) at pinagtibay pa ng desisyong arbitral noong 2016 na bumura sa malawak at kathang-isip na pag-angkin ng Tsina.

“Ito ang anyo ng pagkatalo na walang putok ng baril,” babala niya. “Nauuna ang pagsuko ng argumento bago ang mismong laban.”

Ipinaliwanag din niyang hindi kinakailangan ang hiwalay na mga coordinate upang maitatag ang Exclusive Economic Zone ng Pilipinas, sapagkat ang mga karapatang pandagat ay likas na nagmumula sa archipelagic baselines. Samantala, ang tinatawag na nine-dash line ng Tsina ay wala umanong batayan at walang bisa sa mata ng internasyonal na batas.

Pananagutan sa Loob ng Bansa

Hindi rin pinalampas ni Goitia ang epekto ng ilang pahayag mula kina Senador Rodante Marcoleta, Senador Robin Padilla, at ilang personalidad sa midya na patuloy umanong kumukuwestiyon sa mga karapatang pandagat ng Pilipinas.

“Ang soberanya ay hindi usapin ng opinyon,” giit ni Goitia. “Ito ay nakapaloob sa Konstitusyon at sa batas. Ang pagdududa rito ay tahasang banta sa kakayahan ng Republika na ipagtanggol ang sarili.”

Palawan, Bahagi ng Pilipinas

Mariin ding itinanggi ni Goitia ang pag-angkin ng Tsina sa Palawan, na aniya’y walang anumang legal at historikal na batayan.

“Ang Palawan ay hindi kailanman naging bahagi ng Tsina,” ani niya. “Walang dinastiyang Tsino ang namahala rito at walang kasunduang naglipat ng soberanya.”

Ayon pa kay Goitia, mapanganib ang pagtatangkang ilarawan bilang probokasyon ang pagpapatupad ng batas ng Pilipinas sa sarili nitong teritoryo. “Ang pagtatanggol sa ligal na atin ay obligasyon,” diin niya, kasabay ng pagtukoy sa mga umano’y kampanya ng disimpormasyon laban sa Philippine Coast Guard at sa mga malinaw na briefing ni Commodore Jay Tarriela.

“Walang alitang legal ukol sa Palawan,” giit ni Goitia. “Kasinungalingan lamang ang ipinapakalat.”

Paninindigan ng Bayan

Sa huli, iginiit ni Goitia na hindi dapat malinlang ang mamamayang Pilipino sa mga panawagang binibihisan ang pagsuko bilang pagiging praktikal.

“Ganito palagi nagsisimula ang pananakop,” wika niya. “Sa pagsasabing masyadong mahina ang isang bayan upang lumaban. Ngunit paulit-ulit nang pinatutunayan ng kasaysayan na mali ang ganitong paniniwala tuwing pinipili ng mga Pilipino ang tapang kaysa takot.”

Binigyang-diin niya na ang pagtatanggol sa soberanya ay hindi pagiging agresibo kundi tungkulin at pagmamahal sa bayan.

“Walang isusukong teritoryo. Walang soberanyang ipagkakasundo. Ang Pilipinas ay naninindigan.”

Si Dr. Jose Antonio Goitia ay Chairman Emeritus ng Alyansa ng Bantay sa Kapayapaan at Demokrasya (ABKD), People’s Alliance for Democracy and Reforms (PADER), Liga Independencia Pilipinas (LIPI), at ng Filipinos Do Not Yield Movement (FDNY). Siya ay may hawak na Juris Doctor at Doctor of Philosophy (PhD), gayundin ang mga advanced degree na MNSA, MPA, at MBA, bukod pa sa iba.