Mariing binatikos ni Chairman Emeritus Dr. Jose Antonio Goitia ang mga paratang ni Arnedo S. Valera, na si Pangulong Ferdinand “Bongbong” Marcos Jr. ang dapat sisihin sa kontrobersiya sa budget. Para kay Goitia, ito ay “hindi lang panlilinlang kundi hayagang kasinungalingan laban sa ating Konstitusyon.”

Ang Kongreso ang tunay na may gawa.

“Malinaw ang sinasabi ng Konstitusyon,” diin ni Goitia. “Nasa House of Representatives nagsisimula at tinatapos ang lahat ng appropriation bills. Ang Kongreso ang gumagawa, nagdedebate, at pumapasa ng budget — kasama ang lahat ng insertions. Kung may anomalya, sila ang dapat unang managot. Ang pagsisi lahat sa Pangulo ay hindi lang mali, kundi insulto sa prinsipyo ng separation of powers.”

Ang veto ay panangga, hindi armas.

Sa isyu ng veto, matapang ang sagot ni Goitia:
“Ang veto ay panangga laban sa mali, hindi espada para patayin ang buong budget. Hindi pwedeng gawing super-legislator ang Pangulo. Kung basta na lang iveto ang bilyun-bilyong proyekto nang walang sapat na basehan, magiging abuso iyon at paralisado ang mga komunidad. Ang tunay na lider ay maingat at matalino, hindi pabigla-bigla.”

Impeachment at pagbibitiw: maling gamit ng Konstitusyon.

Mariin ding tinutulan ni Goitia ang mga panawagang impeachment.
“Ang impeachment ay para lang sa matinding pag-abuso, pagtataksil sa bayan, o tahasang paglabag sa Konstitusyon. Ang pagpirma sa budget na dumaan sa tamang proseso ay hindi pasok dito. Kung gagamitin ang lohika ng mga kritiko, lahat ng Pangulo mula 1987 dapat nang na-impeach. Iyan ay hindi batas, iyan ay ilusyon ng mga pulitiko.”

Tungkol naman sa pagbibitiw, binigyang-diin ni Goitia: “Hindi remedyo ng Konstitusyon ang pagbibitiw. Ito’y personal na desisyon, hindi pwedeng ipilit ng mga maiingay na kritiko. Ang tanging legal na paraan ay impeachment o halalan. Lahat ng lampas dito ay kaguluhan at pagyurak sa demokrasya.”

Independent Commission: hindi panakip, kundi hustisya.

Depensa pa ni Goitia sa pagbubuo ng komisyon:
“May malinaw na kapangyarihan ang Pangulo sa ilalim ng Administrative Code na bumuo ng fact-finding bodies. Ang layunin nito ay imbestigahan at maglatag ng ebidensyang tatayo sa korte. Ang sabihing ‘iniimbestigahan ang sarili’ ay murang propaganda. Ang tunay na transparency ay nasa proseso, ebidensya, at istruktura — hindi sa mababaw na sigaw.”

Pananagutan ng lahat, hindi ng iisa.

Sa huli, pinuna ni Goitia ang kasinungalingan ng mga kritiko:
“Ang budget ay gawa ng buong Konstitusyonal na proseso. Kongreso ang utak, Ehekutibo ang tagasuri, Hudikatura ang bantay. Ang sisihin lang ang Pangulo habang pinapalusot ang Kongreso ay nakalihis sa katotohanan. Si Pangulong Marcos ay nagpakita ng kahinahunan at katatagan. Ang tunay na banta ay nasa mga gumagamit ng kasinungalingan at panlilinlang para pahinain ang Republika.”

Si Dr. Jose Antonio Goitia ay kinikilala bilang Chairman Emeritus ng apat na makabayan at sibikong organisasyon: ang Alyansa ng Bantay sa Kapayapaan at Demokrasya (ABKD), People’s Alliance for Democracy and Reforms (PADER), Liga Independencia Pilipinas (LIPI), at Filipinos Do Not Yield (FDNY) Movement.(MARISA SON)